Halloween party ideas 2015
banner

      کەمال رەوف       
بزووتنەوەی گۆران بەهەڵە خوێندنەوەی بۆبەشداری حكومەت كرد و هەر بەوخەیاڵەشەوە بەشداری لەحكومەتێكی ئەزموون شكستخواردو كرد. گۆران لەسەرەتادا چەقی رەخنەو سەرنجەكانی لەسەر سستەمەكە بوو نەك كارەكتەرەكان، بەڵام لەكتوپرێكدا ئەو تێروانیینە گۆردا بۆ ئەوەی وەزارەت وەرگرن نەك پۆستی وەزیر بەتەنها، ئەمەش ئەو خەیاڵەی بۆ دروستكردن كە بتوانن لەو شوێنانەی بەدەست ئەوانەوەیە نمونەیەكی سەركەوتوو نیشان بدەن و بەشداریكردنیان خاڵی جیاوازیان لەگەڵ ئەوانی تر توختربكاتەوە، بەڵام بەشداریكردنەكەیان پێچەوانەی خەیاڵ و ئاراستەكەیان بوو، تادەهات خاڵی ناوكۆیی و لەكچوونی زیاتریان بۆ دروست ئەبوو لەگەڵ ئەوانەی خۆیان رەخنەیان لەسەریان هەبوو.

گۆران پێش ئەوەی وەزیرەكانیان لە حكومەت دەربكرێن، پێش هەر شونێك، ناو ریزەكانی بزووتنەوەی گۆران پربوو لە گللەیی و گازەندە لەسەر بریاری چۆنیەتی بەشداری و لەسەر ئەدای كارەكتەرەكانیان. گۆران كاتێك زانی وەزیرەكان و پۆستەكانیان هیچ نییە جگە لەچەند برخویەكی بچووكی مەكینە گەورەكە، كاتێك زانی ئەم تۆری جاڵجاڵۆكەیە كە ناوحكومەتە سەری داوەكەی بەدەست خۆیەوە نییە، ئەوكاتە تازە دەستی چووبوو بەزاخدا، دەشیزانی تازە نەبەگۆرینی كەسەكان هەڵەكە پشتراستدەكرێتەوە نە بەپاشەكشەی یەكلایەنە، بۆیە گۆران لە دەرفەتێك ئەگەرا بەزیانێكی كەمەوە لێ‌ بێتە دەرەوە، كە دواتر پارتی بە ئینفیعالێكی سیاسی و بریارێكی نایاسایی گۆرانی لەم ئەزمەیە قوتار كرد.

بریارەكەی پارتی بۆ پەكخستنی پەرلەمان و دورخستنەوەی وەزیرەكان خزمەتێكی گەورەی بە دۆخی گۆران كرد، فرسەتێكی باشیش بوو بۆ ئەوەی گۆران شانی خۆی خاڵی بكاتەوە لەو هەموو كەموكورتییەی كەئێستاو ئەوساش هەیبوو، بەپێچەوانەوە مانەوەی گۆران لەحكومەتدا تا ئێستا پرسیاری زۆرجدی تری لەسەر بزووتنەوەو سەركردەكانی دروست ئەكرد، بەپێچەوانەی بۆ چوونی هەندێك كەس كەلایان وایە پارتی لەرووی سیاسی و ئابورییەوە سودی لەو هەنگاوەی وەرگرتوە، چونكە ئەوكاتەو ئێستاش هەر پارتی خاوەن دواین بریاری چارەنوسساز بووە ئەوانی تر بەشدار بوون لەحكومەت نەك شەریك.

گۆران هەقە لەروویەكەوە سوپازگوزاری پارتی بێت، سوپاسگوزاری بێت كەبەم هەنگاوەی هەم باری خۆی قورستر كرد، هەم گۆرانیشی لەچاڵێك هێنایە دەرەوە كەئەستەم بوو پێشبینی ئەوەبكرێت خۆیان بەئاسانی توانای ئەوەیان هەبێت وەك ئێستا بەكەمترین زیان لێی بێنە دەرەوە. تائێرە بەباش و خراپ پارتی كاری خۆیی دەرهەق بە گۆران كرد، ئەوەی كەماوەتەوە بریاری گۆرانە كە چاو و بیریان بچێتە سەر جووڵەیەكی دی جگە لەگەرانەوە بۆ ناوحكومەتێك كەبەشداریان پێبكرێت نەك شەراكەت.
يتم التشغيل بواسطة Blogger.

لەلایەن ئاژانسی وڵات