Halloween party ideas 2015
banner




11ی ئەم مانگە، مەسعود بارزانی سەردانی ڕۆژئاوای كەركوكی كرد و لەگەڵ سەردانەكەیدا دوو هێزی سەربازی لە هەولێرەوە برد بۆ ئەو سنوورە و لەوێ جێگیر كران، كە مەبەست لێیان كێڵگە نەوتییەكانی كەركوك و گوشارخستنه‌ سەر پەكەكە لە مەخمووره‌ و لە میانەی كۆبوونەوەیەكیشدا لەگەڵ فەرماندە سەربازییەكانی پارتی بارزانی داوای كردووە هێزەكەی یەكێتیی لە ماوەی 10 ڕۆژدا كۆمپانیای نەوتی كەركوك چۆڵ بكەن.

ڕەشاد گەڵاڵی لێپرسراوی كۆمیتەی مەخمووری یەكێتیی بە “ئاژانس”ی وت: ״جووڵاندنی ئەو هێزە پەیوەندیی بە شەڕی داعشەوە نییە، چونكە لە ماوەی زیاتر لە دوو ساڵە شەڕی ئەو گرووپە هەیە و پارتی هێزێكی بەو قەبارەیە نەبردووەتە سنوورەكە״.

بە وتەی ئەو بەرپرسەی یەكێتیی مەبەست لە جێگیركردنی هێزەكەی پارتی بەشێكیان ترسە لە خەڵكی كەركوك كە هێرش بكەنە سەر كێڵگە نەوتییەكانی سنووری دوبز، كە ئێستا لەژێر دەسەڵاتی كۆمپانیای (كار)دایە و بەشەكەی دیكەشی بۆ فشارخستنە سەر گەریلاكانی پەكەكەیە لەودیوی چیای قەرەچۆغ كە كەمپی ڕۆستەم جودی لە قەزای مەخموور دەپارێزن.

فەرماندەیەكی سەربازی لەناو هێزەكانی پشتیوانیی (یەك)ی سەر بە پارتی كە لەبەر هەستیاریی پرسەكە نەیویست ناوی بڵاو بكرێتەوە بە “ئاژانس”ی وت: ״بەشێك لە هێزەكانمان لەگەڵ سەردانەكەی بارزانی بۆ كەركوك هاتبوونە سنووری دوبز ‌و لە گوندی (دركە) جێگیر كراون، كە چەند كیلۆمەترێك لە كێڵگەی بای حەسەنەوە دوورە، بەشێكی تریشی لەسەر چیای قەرەچۆغ لە پشت ناحیەی سەرگەڕان جێگیر كراون كە ڕاستەوخۆ دەكاتە پشت مەخموور و بۆ فشارخستنە سەر پەكەكەیە لەو سنوورە و فەرماندەیی هەولێری هێزەكانی پێشمەرگەش خراونەتە ئامادەباشییەوە بۆ جووڵەپێكردن بەرەو كێڵگە نەوتییەكانی سنووری دوبز هەر كاتێك بزانرێت كە هەڕەشەیان لەسەر بێت״.

لە كاتی سەردانیدا بۆ كەركوك بارزانی كۆبوونەوەیەكی نهێنیی لەگەڵ بەشێك لە سەركردە سەربازییەكانی پێشمەرگەی پارتی ئەنجام داوە.

مام سیامەند فەرماندەی لیوای 136ی هێزەكانی پێشمەرگە كە لە پشكی یەكێتییە لە سنووری ڕۆژئاوای كەركوك بە “ئاژانس”ی وت: ״تەنیا فەرماندەكانی پارتی بانگهێشتی كۆبوونەوەكە كرابوون و ئێمەیان لە هاتنەكەی ئاگادار نەكردبووەوه‌״.

یەكێك لە ئامادەبووانی كۆبوونەوەكە كە لە بارەگای میحوەری ڕۆژئاوای كەركوكی هێزەكانی پێشمەرگە بەڕێوە چوو بە “ئاژانس”ی وت: ״بارزانی باسی لە كۆنتڕۆڵكردنی كۆمپانیای نەوتی باكوور كردووە لە لایەن هێزەكەی یەكێتییەوە و داوای كردووە لە ماوەی 10 ڕۆژی داهاتوودا ئەو هێزە بكشێنەوە شوێنەكەی خۆیان״.
يتم التشغيل بواسطة Blogger.

لەلایەن ئاژانسی وڵات