Halloween party ideas 2015
banner




یوسف محەمەد سەرۆکى پەرلەمانى کوردستان لە نووسراوێکدا داواى لە کۆمسیۆنى باڵاى سەربەخۆى هەڵبژاردن و ڕاپرسیى هەرێمى کوردستان کرد، کە لە یەک کاتدا ئامادەسازى بکەن بۆ ئەنجامدانى هەڵبژاردنەکانى پەرلەمان و سەرۆکى هەرێم و ڕیفراندۆم بۆ سەربەخۆیى کوردستان، کە ناوچە کوردستانییەکانى دەرەوەى هەرێمى کوردستانیش بگرێتەوە.

یوسف محەمەد سەرۆکى پەرلەمانى کوردستان ڕۆژى ٢٩ى ئایاری ٢٠١٧، واتە ١٠ ڕۆژ لەوە پێش نووسراوێکى ئاڕاستەى ئەنجوومەنى کۆمسیارانى کۆمسیۆنى باڵاى سەربەخۆى هەڵبژاردن و ڕاپرسیى هەرێمى کوردستان لەبارەى ئەنجامدانى هەڵبژاردنە گشتییەکانى پەرلەمانى کوردستان و سەرۆکى هەرێم کرد.

لەو نووسراوەدا ئەو یاسا و مادە یاساییانە خراونەتەڕوو، کە کۆمسیۆن لەژێر چاودێرى و فەرمانى پەرلەمانى کوردستاندایە و بۆ ئەوەش داواکراوە، کۆمسیۆن لە یەک کاتدا ئامادەسازى بۆ هەڵبژاردنەکانى پەرلەمان و سەرۆکى هەرێم و ڕیفراندۆم بۆ سەربەخۆیى کوردستان بکات.

لەو نووسراوەى سەرۆکى پەرلەماندا بە دوو خاڵ داوا کراوە:

یەکەم: کاتى هەڵبژاردنە گشتییەکانى خولى پێنجەمى هەڵبژاردنى پەرلەمانى کوردستان بەپێى یاساى هەڵبژاردنى پەرلەمانى کوردستان / عێراق ژمارە ١ى ساڵى ١٩٩٢ى هەموارکراو و هەڵبژاردنى سەرۆکى هەرێمى کوردستان دیارى بکەن، بەپیى یاساى سەرۆکایەتیى هەرێمى کوردستان / عێراق و ژمارە ١ى ساڵى ٢٠٠٥ى هەموارکراو، ئامادەسازیى تەواو بکەن بۆ ئەنجامدانى هەڵبژاردنەکان بەشێوەیەکى دروست و پاک و بێگەرد لە ماوەى ٦٠ ڕۆژ بەرلە ٦/١١/٢٠١٧.

دووەم: ئامادەسازیى سەرەتایى ئەنجام بدەن بۆ ئەنجامدانى ڕیفراندۆم بۆ سەربەخۆیى کوردستان لە هەمان کاتى هەڵبژاردنە گشتییەکانى پەرلەمان و سەرۆکى هەرێم ئەگەر ئەو کاتە بە یاسایەک شێوازى ئەنجامدانى ڕیفراندۆم لە پەرلەمانى کوردستانەوە ڕێکخرا، بەشێوەیەک ڕاپرسى لە کەرکوک و ناوچە کوردستانیەیکانى دەرەوەى هەرێمیش ئەنجام بدرێت.


دەقى نووسراوەکەى سەرۆکى پەرلەمانى کوردستان


بۆ ئەنجوومەنى کۆمسیارانى کۆمسیۆنى باڵاى سەربەخۆى هەڵبژاردن و ڕاپرسى

بابەت/ ئەنجامدانى هەڵبژاردنە گشتییەکانى پەرلەمانى کوردستان و سەرۆکى هەرێم

لە ڕوانگەى ئەوەى کە لە ٦/١١/٢٠١٧ چوار ساڵ بەسەر ویلایەتى خولى چوارەمى پەرلەمانى کوردستان تێدەپەڕێت و کۆتایى پێدێت، بەپێى ماددەى پەنجا و یەکى یاساى هەڵبژاردنى پەرلەمانى کوردستان ژمارە (١)ی ساڵى ١٩٩٢ى هەموارکراو، لەبەر ئەوەى ویلایەتیى درێژکراوەى سەرۆکایەتیى هەرێمى کوردستان لە ١٩/٨/٢٠١٥ کۆتایى پێهاتووە و ئیتر یاراى درێژکردنەوەى نییە.

بەپێى ماددەى یەکەمى یاساى درێژکردنەوەى ویلایەتى سەرۆکى هەرێمى کوردستان – عێراق ژمارە ١٩ى ساڵى ٢٠١٣ و لەو کاتەدا کۆمسیۆن ئەیتوانى هەڵبژاردنى گشتیى سەرۆکى هەرێم ئەنجام بدات و، لە هەمان کاتدا لەبەر ئەوەى پێویستە هەڵبژاردنى سەرۆکى هەرێم هاوکات لەگەڵ هەڵبژاردنى پەرلەمانى کوردستان ئەنجام بدرێت.

بەپێى ماددەى (٤)ى یاساى سەرۆکایەتیى هەرێمى کوردستان / عێراق ژمارە ١ى ساڵى ٢٠٠٥ى هەموارکراو، لە ڕوانگەى ئەوەى کۆمسیۆنى باڵاى سەربەخۆى هةڵبژاردن و ڕاپرسى ملکەچە بۆ چاودێریکردنى پەرلەمان و بەرپرسیارە بەرامبەرى بەپێى ماددوەى (سێیەم)ی یاساى کۆمسیۆنى باڵاى سەربەخۆى هەڵبژاردن و ڕاپرسیى ژمارە ٤ى ساڵى ٢٠١٤، لەبەر ئەوەى پێگەى سەرۆکایەتیى هەرێم کێشەى شەرعیەتى یاسایى هەیە بەپێى مادەکانى (٣ و ١٧)ی یاساى سەرۆکایەتیى هەرێمى کوردستان / عێراق ژمارە ١ى ساڵى ٢٠٠٥ى هەموارکراو ومادەى یەکەمى یاساى درێژکردنەوەى ویلایەتى سەرۆکى هەرێمى کوردستان – عێراق ژمارە ١٩ى ساڵى ٢٠١٣،

لە ڕوانگەى ئەوەى بەپێى مادەى ١٢ى پەیڕەوى ژمارە ٢ى ساڵى ٢٠١٥ى کۆمسیۆنى باڵاى سەربەخۆى هەڵبژاردن و ڕاپرسى، پێویستە بەر لە ١٨٠ ڕۆژ لە وادەى هەڵبژاردنەکان، دەست بە ئامادەکارى بکرێت!

لەبەر هەموو ئەوانەى لە سەرەوە باسکران و لەبەر ڕوانگەى بەرپرسیارێتیى نیشتمانی و وەزیفیمان لە سەرۆکایەتیى پەرلەمانى کوردستان و وەک پابەندبوون بە بەها جێگیرەکانمان داواتا لێدەکەین کە:

یەکەم: کاتى هەڵبژاردنە گشتییەکانى خولى پێنجەمى هەڵبژاردنى پەرلەمانى کوردستان بەپێى یاساى هەڵبژاردنى پەرلەمانى کوردستان / عێراق ژمارە ١ى ساڵى ١٩٩٢ى هەموارکراو و هەڵبژاردنى سەرۆکى هەرێمى کوردستان دیارى بکەن، بەپیى یاساى سەرۆکایەتیى هەرێمى کوردستان / عێراق و ژمارە ١ى ساڵى ٢٠٠٥ى هەموارکراو، ئامادەسازیى تەواو بکەن بۆ ئەنجامدانى هەڵبژاردنەکان بەشێوەیەکى دروست و پاک و بێگەر لە ماوەى ٦٠ ڕۆژ بەرلە ٦/١١/٢٠١٧.

دووەم: ئامادەسازیى سەرەتایى ئەنجام بدەن بۆ ئەنجامدانى ڕیفراندۆم بۆ سەربەخۆیى کوردستان لە هەمان کاتى هەڵبژاردنە گشتییەکانى پەرلەمان و سەرۆکى هەرێم ئەگەر ئەو کاتە بە یاسایەک شێوازى ئەنجامدانى ڕیفراندۆم لە پەرلەمانى کوردستانەوە ڕێکخرا، بەشێوەیەک ڕاپرسى لە کەرکوک و ناوچە کوردستانیەیکانى دەرەوەى هەرێمیش ئەنجام بدرێت.


د. یوسف محەمە سادق
سەرۆکى پەرلەمانى کوردستان
يتم التشغيل بواسطة Blogger.

لەلایەن ئاژانسی وڵات

جه‌ژنتان

پیرۆزبێت

جه‌ژنتان

پیرۆزبێت