Halloween party ideas 2015
banner



ئەحمەد میرە

توانای ڕەتكردنەوەی بڕیارە سیاسییەكان لە هۆشمەندیی‌و ئاگایی خەڵكەوە سەرچاوەدەگرێت، چونكە ڕەتكردنەوە پرۆسەیەكە، هەمیشە ئەو كۆمەڵگایانە توانای ئەنجامدانیان هەیە كە ئاستی هۆشیارییان بەرزەو قۆناغی كۆیلەبوونیان تێپەڕاندووە. لە بەرانبەریشدا هەمیشە ئەو كۆمەڵگایانەی دیاردەی كۆیلەبوون‌و بێئاگاییان تێدا زاڵە، بەتەواوەتیی خۆیان ڕادەستی هەموو جۆرە بڕیارێكی سیاسیی دەكەن، بێئەوەی لێیتێبگەن‌و ڕەهەندەكانی ڕاڤەبكەن. 

ئەگەر ئێمە كۆمەڵگای مرۆڤایەتیی بەسەر هەردوو ئاراستەی كۆیلەبوون‌و ئازادبووندا دابەشبكەین، ئەوە كۆمەڵگای كوردیی لەباشووری كوردستان بەهەموو پێوەرەكانی ناساندنی كۆمەڵگای كۆیلەكان، دەبێتە كۆمەڵگای كۆیلە، چونكە بەهەموو ئەو بارودۆخە خرابەی كە بەزۆر بەسەریدا سەپێنراوە ڕازییە! تەنانەت بەرگرییشی لێدەكات! 

هەمیشە لەمێژوودا كۆیلەكان لەسەر هەردوو هێڵی ڕازیبوون‌و بەرگریكردن وەستاون بۆ پاراستنی ئەو دەسەڵاتەی كە دەیانچەوسێنێتەوە، بەجۆرێك بەرگریی لەدەسەڵات دەكەن كە چێژی لێوەردەگرن‌و پێیانوایە ئەمە ئەركێكی خوداییە و دەبێت دڵسۆزانە پارێزگاریی لێبكەن‌و خۆیشیان لەپێناویدا بەكوشتبدەن. بەپێچەوانەشەوە، ئەو كۆمەڵگایانەی خوازیاری ئازادین، بەدوای زریانی گۆڕانكاریی دەكەون‌و دەیانەوێت هەر چۆنێكیان كردووە بارودۆخەكە بگۆڕن، لەم جۆرە كۆمەڵگایانەدا هەرگیز مرۆڤەكان خۆشحاڵ نین بەو پیاوانەی كە خۆیان ناوناوە شۆڕشگێڕ، بەڵكو لە هزری ئەواندا ئەم جۆرە پیاوانە نەخۆشن‌و لانی كەم نابێت حوكمڕان بن، لەهەندێك باردا ئەگەر پێویستبكات دەبێت بكوژرێن و لەسێدارەبدرێن، چونكە مانەوەیان كۆسپە لەبەردەم بنیاتنانی كۆمەڵگایەكی نوێدا. 

دۆخی هەرێمی كوردستان ئەوەندە خراپ ‌و شڵەژاوە، نووزەی باشبوون‌و تێپەڕاندنی تێدا نەماوە، كەچی ئەوەی لەشەقامی گشتیی كوردستاندا دەگوزەرێت، بریتییە لە بێدەنگییەكی ترسناك، بەدڵنییاییەوە ئەو بێدەنگییە وادەكات بارودۆخەكە بەجۆرێك خراپ بێت، حەسرەت بۆ داگیركەرێك بخوازین تا لەدەست چەتە ناوخۆییەكان ڕزگارمانبكات. 

لە ئێستادا پارتیی خەڵكی كوردستانی سەرقاڵكردووە بەیارییەكی ئاگرینەوە، ئەم یارییە نە ڕاستەو نە گرنگەو نە بەرژەوەندیی خەڵكیشی تێدایە، ئەویش یاریی ڕیفراندۆمە. 

بەڵام ئەوەی لەیارییەكەی پارتیی ترسناكترە، ئەوەیە كۆمەڵگای كوردیی بڕستی ئەوەی نییە ئەم یارییە ڕەتبكاتەوە، تەنانەت حیزبەكانی نەیاری پارتییش لەدۆخێكی شەرمنانەی بێئیرادەدا هەوڵدەدەن بۆ جوانكردنی یارییەكەی پارتی. لەكاتێكدا بۆ كۆمەڵگای هۆشیار لەسەر بنەمای پاراستنی بەرژەوەندییەكانی، ڕەتكردنەوەی پرسێكی لەو جۆرە بەو میكانیزمانەی ئێستای، شتێكی سروشتییەو دەبێت ئەنجامیبدەن، چونكە ئەوەی بەناوی ڕیفراندۆمەوە دەكرێت، سەرەڕای نالەباریی دۆخی هەرێمیی‌و نێودەوڵەتیی، لەناوخۆی هەرێمیشدا ڕەهەندەكانی یاساییبوون‌و هاودەنگیی كۆمەڵگای كوردیی لەدەستداوە. بەدیوێكی تردا، ئەوانەی هەڵدەستن بەئەنجامدانی پرسێكی وەها گرنگ، شەرعیەتیان نەماوەو سەرچاوەی هەڵتەكاندنی ئەو دامەزراوە یاساییانەن، كە دەبوو لەپشت پرۆسەی ئەنجامدانی ڕیفراندۆمەوە بوونایە. 

بۆیە پێشنیاردەكەم؛ دەنگی نەخێر بۆ ڕەتكردنەوەی یاریی ڕیفۆاندۆم ڕوونترو بوێرانەتر بێت، هەم لەناو خەڵك‌و میدیاو هەم لەناو حیزبە سیاسییەكاندا، وەك چۆن پشتیوانیكردن لەم یارییە مەترسیدارە ئاشكرایەو چەتەكانی پشتی بێ ترس‌و بوێرانە بانگەشەی بۆ دەكەن. پێویستە ئاراستەكەی تریش بەهەمان پێوانە كار لەسەر ڕەتكردنەوەی بكات، بێ ئەوەی بترسێت لە تۆمەتی خیانەت‌و نیشتیمانفرۆشیی، چونكە لە بنەڕەتدا ڕەتكردنەوەی ئەم یارییە، كارێكی یاسایی‌و ئەخلاقیی‌و نیشتیمانییە.  
يتم التشغيل بواسطة Blogger.

لەلایەن ئاژانسی وڵات